Emiratet e Bashkuara Arabe njohën pavarësinë e Kosovës

Abu Dabi/Prishtinë, 15 tetor - Emiratet e Bashkuara Arabe e njohën pavarësinë e Kosovës, duke u bërë shteti i parë arab që e njeh Kosovën. Me këtë njohje numri i shteteve që pranojnë pavarësinë rritet në 51. "Emiratet e Bashkuara Arabe shpallin se e njohin Kosovën si shtet të pavarur", ka njoftuar WAM, agjencia zyrtare e lajmeve në këtë shtet arab. "Kjo lëvizje është në një linjë me përkrahjen për të drejtën legjitime të popullit për vetëvendosje", citon WAM-në, agjencia franceze e lajmeve (AFP). Ministri i Punëve të Jashtme të Kosovës, Skënder Hyseni, e ka cilësuar shumë të rëndësishme njohjen nga Emiratet e Bashkuara Arabe. Ai ka thënë se kjo njohje është shumë e rëndësishme, sepse vjen pas miratimit të rezolutës së Serbisë në Kombet e Bashkuara. Hyseni ka shfaqur shpresën se shembullin e Emirateve të Bashkuara Arabe do të ndjekin edhe vendet tjera arabe. Ai ka paralajmëruar se edhe dy vende tjera pritet ta njohin shtetin e pavarur të Kosovës së shpejti.