Topi: Njohja e Kosovës nga Maqedonia e Mali i Zi, një lajm i mirë për stabilitetin e rajonit

Tiranë, 10 tetor - Presidenti i Shqipërisë, Bamir Topi, përshëndeti sot njohjen e pavarësisë së Kosovës nga Republika e Maqedonisë dhe Republika e Malit të Zi. Presidenti Topi konsideron se vendimi i djeshëm i Malit të Zi dhe të Maqedonisë për njohjen e pavarësisë së Kosovës është një gjest i shumëpritur dhe mjaft i rëndësishëm për zhvillimet e perspektivës së marrëdhënieve në rajonin ballkanik. "Njohja e pavarësisë së Kosovës nga Republika e Malit të Zi dhe nga Republika e Maqedonisë është jo vetëm një lajm mjaft i mirë që i kontribuon stabilitetit në rajonin ballkanik, por, nga ana tjetër, unë besoj dhe jam i bindur për këtë, që do të ndikojë ndjeshëm edhe në rritjen e ndjeshmërisë të vendeve që janë më larg nga rajoni ballkanik për të marrë vendimin e duhur, të mirëpritur për njohjen nga sa më shumë vende të pavarësisë së Kosovës", theksoi Topi me anë të një deklarate para mediave, duke shprehur bindjen se procesi i njohjes nga fqinjët do të influencojë pozitivisht edhe vende të tjera për ta njohur Kosovën. Me këtë rast Presidenti i Shqipërisë vlerëson "shumë stabilitetin në rajonin tonë ballkanik, mënyrën e moderuar të sjelljes së lidershipit politik në të gjitha këto vende që kanë bërë njohjen e pavarësisë së Kosovës", si dhe vlerësoi me nota shumë pozitive sjelljet e moderuar të lidershipit politik të Kosovës, të të gjitha institucioneve, të cilat po japin shembuj të qartë të ndërtimit të një shteti mbi bazat e multietnicitetit. "Besoj që e ardhmja e Ballkanit, sikurse është demonstruar dhe po vijon të demonstrohet dhe nga vendet, të cilat po bëjnë hapa të rëndësishëm drejt integrimit, padiskutim që do të jetë në rrugën euroatlantike", nënvizoi Presidenti Topi.